काठमाडौं । नेपालकै पहिलो नागढुङ्गा–सिस्नेखोला सुरुङमार्गको औपचारिक उद्घाटन श्रमको सम्मान र समर्पणको कदर गर्ने सन्देशसहित सम्पन्न गरिएको छ।

उद्घाटन समारोहमा विशेष रूपमा निर्माण कार्यमा वर्षौँदेखि निरन्तर खटिएका मुगुका एक श्रमिकबाट सुरुङमार्गको रिबन काटेर उद्घाटन गराइएको थियो। श्रमिककै हातबाट उद्घाटन गराउने निर्णयले श्रमको सम्मान र राष्ट्रिय विकासमा श्रमिकहरूको योगदानलाई उच्च मूल्याङ्कन गरिएको सन्देश दिएको छ।

रिबन काट्ने क्षणमा समारोहमा उपस्थित विशिष्ट व्यक्तित्व, कर्मचारी, निर्माणकर्मी तथा अन्य सहभागीहरूले ताली बजाउँदै श्रमिकप्रति सम्मान व्यक्त गरेका थिए। उद्घाटनको यो दृश्यले विकासका प्रत्येक उपलब्धिको आधार श्रमिकको पसिना, मेहनत र समर्पण रहेको सन्देश प्रवाह गरेको छ।

नेपालकै पहिलो सडक सुरुङमार्गका रूपमा रहेको नागढुङ्गा–सिस्नेखोला सुरुङमार्गले काठमाडौं उपत्यकाको यातायात व्यवस्थापनलाई सहज बनाउनुका साथै यात्रा समय घटाउने, सडक सुरक्षा बढाउने र आर्थिक गतिविधिमा समेत सकारात्मक प्रभाव पार्ने अपेक्षा गरिएको छ।

यस ऐतिहासिक आयोजनाले पूर्वाधार विकाससँगै ‘श्रमको सम्मान, समर्पणको कदर’ भन्ने सन्देशलाई व्यवहारमै उतारेको छ। राष्ट्रिय समृद्धिको आधार श्रमिकहरूको अथक मेहनत र समर्पण रहेको तथ्यलाई उद्घाटन समारोहले थप उजागर गरेको छ।