काठमान्डौं-नेपालमा सुरक्षित यौन व्यवहार र परिवार नियोजनप्रति चेतना बढ्दै गएको संकेत देखिएको छ । चालु आर्थिक वर्ष २०८२/८३ को पहिलो पाँच महिनामै नेपालले झन्डै १० करोड रुपैयाँ बराबरका १ करोड २८ लाखभन्दा बढी कन्डम आयात गरेको तथ्य बाहिर आएको छ ।

भन्सार विभागको तथ्याङ्कअनुसार साउनदेखि मंसिरसम्मको अवधिमा ९ करोड ९९ लाख २५ हजार रुपैयाँ बराबरका १ करोड २८ लाख ४५ हजार ८६७ पीस कन्डम नेपाल भित्रिएका छन् । यो अघिल्ला वर्षहरूको तुलनामा उल्लेखनीय वृद्धि हो ।

विशेषगरी मंसिर महिनामा मात्रै १८ लाख ६६ हजारभन्दा बढी कन्डम आयात भएको छ, जसको मूल्य १ करोड ७४ लाख ७९ हजार रुपैयाँ पुगेको छ । कात्तिकमा ५ लाख ६५ हजार पीस र असोजमा ११ लाख ६३ हजारभन्दा बढी कन्डम आयात भएको भन्सार तथ्याङ्कले देखाउँछ ।

विशेषज्ञहरूका अनुसार यौन स्वास्थ्यबारे बढ्दो चेतना, परिवार नियोजनप्रतिको चासो र सुरक्षित सम्बन्धको आवश्यकताले कन्डमको माग बढाएको हुन सक्छ । साथै, युवा पुस्तामा खुलापन, शहरी जीवनशैली र स्वास्थ्य अभियानहरूको प्रभाव पनि देखिन थालेको अनुमान गरिएको छ ।

सरोकारवालाहरू भन्छन्, “यो तथ्याङ्कले नेपाली समाजमा व्यवहारिक परिवर्तन संकेत गर्छ । सुरक्षित यौन सम्बन्ध अब लुकाउने विषय नभई स्वास्थ्यसँग जोडिएको विषयका रूपमा लिन थालिएको छ ।”

कन्डम आयातमा आएको यो उछालले स्वास्थ्य सचेतना बढेको सकारात्मक सन्देश दिन्छ कि जीवनशैलीमा ठूलो परिवर्तन भइरहेको संकेत हो ? यसबारे सामाजिक सञ्जालदेखि चिया गफसम्म बहस सुरु भएको छ ।