मेलम्ची– सिन्धुपाल्चोक जिल्लाको बाह्रबिसे नगरपालिकाले आगलागीजन्य विपद् नियन्त्रणका लागि बारुण यन्त्र (दमकल) प्राप्त गरेको छ। जापान सरकारको भोलेन्टर क्रस नेपाल (Volunteer Cross Nepal) को समन्वयमा नगरपालिकाले उक्त दमकल प्राप्त गरेको हो।

नगरपालिकाका मेयर बालकृष्ण बस्नेतका अनुसार, यो दमकल पूर्वमन्त्री तथा नेपाली कांग्रेसका केन्द्रीय सदस्य मोहनबहादुर बस्नेतको विशेष पहलमा प्राप्त भएको हो। विकास प्रेमी नेताका रूपमा परिचित बस्नेतले क्षेत्रमा आगलागीजन्य विपद् व्यवस्थापनका लागि दमकलको अत्यावश्यकता महसुस गरेर पहल गरेका थिए।

वडा नम्बर ३ का अध्यक्ष जीवनकुमार भण्डारीका अनुसार, यो दमकल नगरपालिकाको मातहतमा सञ्चालन हुनेछ। आगलागी नियन्त्रणका लागि भरपर्दो माध्यम रहेको यस दमकलले विशेष गरी क्षेत्र नम्बर २ मा देखिएको अत्यावश्यकतालाई सम्बोधन गर्नेछ। साथै, आवश्यकता परेको खण्डमा सिन्धुपाल्चोक क्षेत्र नम्बर १ भरिनै सञ्चालन गर्न सकिने बताइएको छ।

नगरपालिकाले निकट भविष्यमै औपचारिक कार्यक्रम आयोजना गरी दमकल हस्तान्तरण गर्ने तयारी गरेको छ। यस दमकलको आगमनले जिल्लाको विपद् प्रतिकार्य क्षमतामा उल्लेख्य सुधार आउने विश्वास गरिएको छ।