चितवनको सिमलतालमा पहिरोसँगै खसेका बसयात्रुहरूको खोजीमा भारतबाट आएको गोताखोरसहितको प्राविधिक समूह पनि आजदेखि खटेको छ । नेपाल सरकारका तर्फबाट परिचालित उद्धारकर्ताको समूहसँग मिलेर भारतीय सहायता समूह बेपत्ताहरूको खोजीमा जुटेको जिल्ला प्रशासन कार्यालय चितवनले जनाएको छ ।

यसअघि हिजो प्रमुख जिल्ला अधिकारी इन्द्रदेव यादवको अध्यक्षतामा सुरक्षा समिति चितवन र भारतबाट आएको नेसनल डिसास्टर रेस्पोन्स फोर्सको टोलीबीचको संयुक्त बैठकले खोजीकार्य र विधिबारे छलफल गरेको थियो । भारतबाट कुनाल तिवारीको नेतृत्वमा १२ जनाको टोली विशेष प्रविधिसहित हिजो शनिबार नै नेपाल आइपुगेको थियो ।

त्रिशूली नदीमा खसेर बेपत्ता भएको एक साता नाघिसक्दा ३७ जना अझै बेपत्ता छन् । बिहीबार बिहानसम्म २५ वटा शव भेटिएको जिल्ला प्रशासन कार्यालय चितवनले जनाएको छ । यीमध्ये १७ जनाको मात्रै सनाखत भएको छ ।

२८ असार शुक्रबार बिहान २७ जना यात्रु लिएर काठमाडौंबाट रौतहटको गौर जाँदै गरेको ०३–००१ ख २४९५ नम्बर गणपति डिलक्स र ३८ यात्रुसहित पर्साको वीरगञ्जबाट काठमाडौं आउँदै गरेको बागमती प्रदेश ०३–००६ ख १५१६ नम्बरको एञ्जल डिलक्समा पहिरोसँगै त्रिशूलीमा खसेका थिए ।

हराएकामध्ये अहिलेसम्म १९ जना फेला परे पनि बाँकी ४३ जनाको अवस्था अज्ञात छ । पहिरोसँगै खसेका बसमा केही भारतीय नागरिक पनि थिए ।