सिन्धुपाल्चोक । राष्ट्रिय स्वतन्त्र पार्टी (रास्वपा) सिन्धुपाल्चोकको विवादका कारण स्थगित भएको जिल्ला अधिवेशन आगामी साउन २२ गते हुने भएको छ। पार्टीको केन्द्रीय निर्वाचन आयोगले स्थगित अधिवेशन फुकुवा गर्दै निर्वाचन प्रक्रिया पुनः सञ्चालन गर्न निर्देशन दिएपछि नयाँ मिति तय गरिएको हो।

आयोगले जिल्ला अधिवेशनअघि रोकिएको लिसंखु पाखर गाउँपालिकाको अधिवेशन पनि सम्पन्न गर्न निर्देशन दिएको जनाएको छ।

रास्वपाले देशभर जेठ २४ गते एकैसाथ जिल्ला अधिवेशन सुरु गरेको थियो। सिन्धुपाल्चोकमा उद्घाटन सत्र सम्पन्न भए पनि बन्दसत्रमा देखिएको विवादका कारण अधिवेशन अनिश्चितकालका लागि स्थगित भएको थियो।

निर्वाचन समितिका अनुसार अधिवेशन स्थगित हुनुअघि सम्पन्न भएका सबै निर्वाचन प्रक्रिया यथावत रहनेछन्। उम्मेदवारी दर्तालगायत पूरा भइसकेका प्रक्रियालाई निरन्तरता दिइनेछ भने बाँकी निर्वाचन कार्यक्रम नयाँ कार्यतालिकाअनुसार अघि बढाइनेछ।

सभापतिमा पाँच जनाको प्रतिस्पर्धा कायम

जिल्ला सभापति पदका लागि जेपी सिलवाल, चक्रपाणि सिग्देल, पासाङ तामाङ, दिलमान श्रेष्ठ र कुमार श्रेष्ठ ले यसअघि नै उम्मेदवारी दर्ता गराएका छन्। स्थगित अधिवेशन पुनः सञ्चालन हुने निर्णयसँगै उनीहरूको उम्मेदवारी पनि यथावत रहने रास्वपाले जनाएको छ।

सभापतिका प्रत्याशी जेपी सिलवाल ले केन्द्रीय निर्वाचन आयोगले नयाँ मिति घोषणा गरिसकेको र अब अधिवेशनलाई सफलतापूर्वक सम्पन्न गराउन आवश्यक छलफल र तयारी अघि बढाइने बताए।

उनले भने, “अहिलेसम्म नयाँ कुनै घटनाक्रम भएको छैन। केन्द्रीय समितिले भर्खरै नयाँ मिति घोषणा गरेको छ। अब अधिवेशन सफल बनाउन आवश्यक छलफल अघि बढाउँछौं।”