केशव श्रेष्ठ/काठमाडौं-नागार्जुन नगरपालिकाको कवाडी निकासी कर ठेक्का तथा कर कार्यान्वयन प्रक्रियालाई लिएर एक कवाडी व्यवसायीले गम्भीर आरोप लगाएका छन्।

व्यवसायीका अनुसार, नागार्जुन नगरपालिकामा स्थानीय निकासी कर नतिरेको भन्दै कवाडी बोकेका गाडीहरू रोक्ने, राजस्व कार्यालयमा पठाउने तथा व्यापारीहरूलाई धाकधम्की दिँदै त्रासको वातावरण सिर्जना गर्ने कार्य भइरहेको छ। उनले यस कार्यमा काठमाडौं परिसरका एसएसपी दिलिप घिमिरे, काठमाडौंका प्रमुख जिल्ला अधिकारी ईश्वरराज पौडेल तथा दीपेश अग्रवालको नाम उल्लेख गर्दै प्रशासनिक संयन्त्रको दुरुपयोग भएको दाबी गरेका छन्।

व्यवसायीले गत आर्थिक वर्षमा नागार्जुन नगरपालिकाको कवाडी निकासी कर संकलनको ठेक्का प्रक्रियामा पनि अनियमितता भएको आरोप लगाएका छन्। उनका अनुसार, उक्त ठेक्काका लागि आर एण्ड आर ट्रेड कन्सर्न प्रा.लि. ले ७ करोड ३७ लाख रुपैयाँको प्रस्ताव पेश गरेको थियो भने निशान सप्लायर्स ले ३ करोड ३९ लाख रुपैयाँको प्रस्ताव पेश गरेको थियो। त्यसपछि पनि नगरपालिकाका प्रमुख प्रशासकीय अधिकृतसँगको मिलेमतोमा कम रकम प्रस्ताव गर्ने निशान सप्लायर्स लाई ठेक्का सम्झौता गर्न अनुमति दिइएको र यसबाट नगरपालिकालाई करिब ३ करोड ९८ लाख रुपैयाँ बराबरको सम्भावित आर्थिक नोक्सानी पुगेको दाबी गरिएको छ।

व्यवसायीले यस विषयमा अख्तियार, सम्बन्धित मन्त्रालय तथा अन्य निकायबाट निष्पक्ष छानबिन हुनुपर्ने माग गरेका छन्।

यद्यपि, माथि उल्लिखित सबै आरोप व्यवसायीको दाबीमा आधारित हुन्। आरोप लागेका काठमाडौं परिसर, जिल्ला प्रशासन कार्यालय, नागार्जुन नगरपालिका, दीपेश अग्रवाल तथा निशान सप्लायर्सको आधिकारिक प्रतिक्रिया प्राप्त भइसकेको छैन। यी आरोपहरूको स्वतन्त्र पुष्टि पनि हुन बाँकी छ। सम्बन्धित पक्षको प्रतिक्रिया प्राप्त भएपछि समाचार अद्यावधिक गरिनेछ।