काठमाडौं — सुदन गुरुङको उपस्थितिमा आयोजित प्रहरी प्रधान कार्यालयको निरीक्षण कार्यक्रम भावुक क्षणले भरिएको छ। कार्यक्रममा दानबहादुर कार्कीले सम्बोधनका क्रममा प्रहरी संगठनभित्र बढ्दो जागिर छोड्ने प्रवृत्तिबारे गम्भीर चिन्ता व्यक्त गर्दै एकाएक भावुक बनेका छन्।

आईजीपी कार्कीले संगठनलाई टिकाइराख्न नसकेको पीडा व्यक्त गर्दै भने, “मेरो पुलिसलाई टिकाउन सकिनँ… यही नै समस्या हो।” यस क्रममा उनी केही समय स्तब्ध भए भने उनको आवाज भारी र आँखा रसाएका थिए। उक्त दृश्यले हलमा उपस्थित सबैलाई भावुक बनायो र केही क्षणका लागि सन्नाटा छायो।

उनले प्रहरी संगठन सुदृढ बनाउन २० वर्षे सेवा अवधिको पुनरावलोकन, सेवा–सुविधा वृद्धि तथा १६ वर्षमै पेन्सनको व्यवस्था गर्नुपर्ने प्रस्ताव समेत अघि सारे।

यसैबीच, आईजीपीको भावनात्मक सम्बोधनबाट प्रभावित हुँदै गृहमन्त्री गुरुङ आफैं सिटबाट उठेर ताली बजाउन थाले। उनले उपस्थित प्रहरी कर्मचारीहरूलाई समेत उभिएर समर्थन जनाउन आग्रह गरेपछि केही क्षणमै सम्पूर्ण हल तालीले गुञ्जिएको थियो।

उक्त ताली केवल औपचारिक नभई प्रहरी संगठनभित्रको पीडा, समर्थन र भावनाको अभिव्यक्तिका रूपमा देखिएको थियो। तालीपछि पुनः हलमा गहिरो सन्नाटा छाएको थियो, जसले उक्त क्षणलाई अझ गम्भीर र अर्थपूर्ण बनाएको सहभागीहरूले बताएका छन्।

प्रहरी संगठनभित्र बढ्दो असन्तुष्टि र जागिर छोड्ने प्रवृत्तिलाई सम्बोधन गर्न तत्काल सुधार आवश्यक रहेको सन्देश उक्त घटनाले स्पष्ट पारेको छ।