सिन्धुपाल्चोक-जिल्ला कृषि सहकारी संघ सिन्धुपाल्चोकको पाँचौँ वार्षिक साधारणसभा तथा तेस्रो अधिवेशन सम्पन्न भएको छ । अधिवेशनले मित्रलाल चौलागाईंको अध्यक्षतामा नयाँ कार्यसमिति सर्वसम्मत चयन गरेको छ ।
नवनिर्वाचित कार्यसमितिको उपाध्यक्षमा होमनाथ चौलागाईं, सचिवमा रामशरण गिरी र कोषाध्यक्षमा कृष्णप्रसाद पराजुली चयन हुनुभएको छ । सदस्यहरूमा संगिता अर्याल, नारायण गिरी, दीपककुमार लामिछाने, कमलप्रसाद दुलाल र बाबुराम प्यौड्याल चयन हुनुभएको थियो । यस्तै, लेखा समितिको संयोजकमा रामबहादुर लामा तथा सदस्यहरूमा सोनाम लामा र कल्पना दुलाल चयन हुनुभएको तपचुली सामुदायिक कृषि सहकारीका अध्यक्ष मदन थापाले जानकारी दिनुभयो ।

बागमती प्रदेश सहकारी संघका सञ्चालक कृष्ण सुवेदीको प्रमुख आतिथ्यमा सम्पन्न कार्यक्रममा नवनिर्वाचित अध्यक्ष मित्रलाल चौलागाईंले कृषि सहकारीलाई किसानमैत्री, पारदर्शी र उत्पादनमुखी बनाउँदै लैजाने प्रतिबद्धता व्यक्त गर्नुभयो । किसानको उत्पादन लागत घटाउने, बजार सुनिश्चित गर्ने र सहकारीलाई व्यवसायिक तथा आत्मनिर्भर बनाउने दिशामा संघले प्राथमिकताका साथ काम बताउनुभयो ।
कार्यक्रमका प्रमुख अतिथि कृष्ण सुवेदीले कृषि सहकारीहरू स्थानीय अर्थतन्त्रको मेरुदण्ड भएको उल्लेख गर्दै सहकारीमार्फत किसानलाई प्रविधि, तालिम र बजारसँग जोड्न आवश्यक रहेको बताउनुभयो । अधिवेशनले आगामी कार्यकालमा कृषि उत्पादन वृद्धि, सहकारीबीच समन्वय, क्षमता विकास कार्यक्रम सञ्चालन तथा किसानको जीवनस्तर सुधारलाई मुख्य कार्यदिशा बनाउने निर्णय समेत गरेको छ ।