सिन्धुपाल्चोक । काठमाडौंबाट बाह्रबिसेतर्फ गइरहेको अरनिको यातायातको बस (प्र.३.०१ ००५ ख ९९४०) ले मोटरसाइकललाई ठक्कर दिँदा एक जनाको मृत्यु भएको छ भने अर्का एकजना गम्भीर घाइते भएका छन्।

इलाका प्रहरी कार्यालय बाह्रबिसेका अनुसार बा.प्र.०२ ०३७ प ०८५७ नम्बरको मोटरसाइकल उक्त बसको ठक्करमा परेको हो। दुर्घटनामा परेर कैलाली, धनगढी उपमहानगरपालिका–८ का २३ वर्षीय विकास जोशीको घटनास्थलमै मृत्यु भएको छ।

त्यसैगरी, गम्भीर घाइते भएका धनगढी उपमहानगरपालिका–८ कै २३ वर्षीय सुबोध धामीलाई थप उपचारका लागि धुलिखेल अस्पताल पठाइएको प्रहरीले जनाएको छ।

दुर्घटनाको कारणबारे थप अनुसन्धान भइरहेको इलाका प्रहरी कार्यालय बाह्रबिसेका प्रहरी निरीक्षक सुमेश पाण्डे ले जानकारी दिएका छन्।