काठमाडौँ – प्रमुख प्रतिपक्षी दल नेकपा माओवादी केन्द्रले संसद्मा सशक्त रूपमा प्रस्तुत हुने तयारी गरेको छ। झन्डै पाँच महिनापछि माघ १८ गतेदेखि संसद्को हिउँदे अधिवेशन सुरु भएको थियो। संसद्‌को पहिलो दिन संयम अपनाएको बताउने माओवादीले अब प्रभावकारी ढंगले भूमिका निर्वाह गर्ने जनाएको छ।

सांसद माधव सापकोटाका अनुसार बिहीबार बस्ने बैठकमा माओवादी संसदीय दलका नेता पुष्पकमल दाहाल ‘प्रचण्ड’ विशेष समय लिएर सम्बोधन गर्नेछन्। सापकोटाले पहिलो दिन माओवादीले सशक्त प्रतिरोध नगरेको प्रष्ट्याउँदै बिहीबारदेखि सरकारका गलत कामको विरोधमा बलियो रूपमा प्रस्तुत हुने बताए।

“संसद्को पहिलो दिन हामी संयमित थियौँ। बिहीबारको बैठकमा प्रचण्डले सदनमा सम्बोधन गर्नुहुन्छ। त्यसपछि प्रमुख प्रतिपक्ष दलको हैसियतले सरकारका गलत कार्यको विरोधमा सशक्त रूपमा उत्रनेछौँ। अन्य विपक्षी दलहरूसँग समेत सहकार्य गर्दै प्रभावकारी भूमिका खेल्छौँ,” उनले भने।

पहिलो बैठकमा सभामुख देवराज घिमिरेले प्रचण्डलाई २० मिनेट मात्र समय तोकेपछि असन्तुष्टि जनाउँदै माओवादी संसदीय दलले प्रमुख सचेतक हितराज पाण्डेमार्फत आफ्नो असन्तुष्टि प्रकट गरेको थियो। अबको बैठकमा माओवादीले आक्रामक रूपमा आफ्ना मुद्दा उठाउने संकेत गरेको छ।