काठमाडौं । सिन्धुपाल्चोक जिल्लाको बाह्रबिसे नगरपालिका वडा नम्बर १, २ र ६ का युवाहरूले नेपाली कांग्रेस, नेकपा (एमाले) लगायतका राजनीतिक दल परित्याग गरी नेपाल कम्युनिष्ट पार्टी (माओवादी केन्द्र)मा प्रवेश गरेका छन्।

शुक्रबार माओवादी केन्द्रका अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’ले आफ्नो निजी निवास खुमलटारमा नवप्रवेशीहरूलाई खादा ओढाइ स्वागत गरेका छ्न। सोही अवसरमा उनीहरूलाई औपचारिक रूपमा पार्टी सदस्यता पनि प्रदान गरिएको हो।

नवप्रवेशीहरूले आफ्नो स्थानीय तहमा विद्यमान खानेपानी, सिंचाइ र सडक जस्ता आधारभूत सुविधाका समस्याबारे अध्यक्ष प्रचण्डसमक्ष जानकारी गराउँदै समाधानको माग राखेका थिए। जवाफमा अध्यक्ष प्रचण्डले सिन्धुपाल्चोकको समग्र विकासमा माओवादी केन्द्र सदैव संलग्न रहेको उल्लेख गर्दै, खानेपानी तथा सिंचाइसम्बन्धी परियोजनालाई उच्च प्राथमिकतामा राखिने आश्वासन दिए।

उनले सिन्धुपाल्चोकको आर्थिक समृद्धि र पूर्वाधार विकासका लागि चीन सरकारसँग पटकपटक छलफल भएको जानकारी गराउँदै, हाल आंशिक रूपमा सञ्चालनमा रहेको सीमा नाकालाई पूर्ण रूपमा सञ्चालनमा ल्याउन आवश्यक पहल गरिने प्रतिज्ञा गरे।

साथै, नवप्रवेशीहरूलाई पार्टीभित्र उचित जिम्मेवारी प्रदान गर्न माओवादी केन्द्रका जिल्ला इञ्चार्ज केशव नेपाल तथा केन्द्रीय सदस्य एवं सांसद माधव सापकोटालाई निर्देशन दिएका छन्।