चौतारा अस्पतालले सेवाग्राहीको समस्या, गुनासा र समाधानका उपाय पहिचान गर्न सामाजिक परीक्षण सम्पन्न गरेको छ। परीक्षणका क्रममा सेवाग्राहीले अस्पतालमा भोग्नुपरेका चुनौतीहरूको अध्ययन गरिएको थियो।

अस्पतालमा शल्यक्रिया सेवाका क्रममा रगतको अभावका कारण बिरामीलाई समस्यामा पर्नु पर्ने अवस्थाको समाधानका लागि रगत बैंक (ब्लड बैंक) सञ्चालन गर्न सेवाग्राहीले माग गरेका छन्। अस्पतालले पछिल्लो वर्षको तुलनामा थप सेवा विस्तार गर्दै बिरामीलाई प्रभावकारी सेवा प्रदान गरेको भन्दै सहभागीहरूले खुशी व्यक्त गरेका छन्।

सामाजिक परीक्षणको प्रतिवेदनले अस्पतालमा विगतको तुलनामा सेवामा उल्लेखनीय सुधार भएको देखाएको छ। बिरामीको सुविधाका लागि एम्बुलेन्स संख्या थप गर्नुका साथै ब्लड बैंक सञ्चालनको योजना अघि बढाइएको अस्पतालका अध्यक्ष केशवराज गिरीले जानकारी दिए।

मेडिकल सुपरिटेन्डेन्ट डा. रुद्रमणि भण्डारीका अनुसार सेवा विस्तारपछि विगतको तुलनामा दोब्बर बिरामीले सेवा लिएका छन्। चालु आर्थिक वर्षमा औषधि आपूर्ति, गुणस्तर सुधार, कर्मचारी प्रोत्साहन, उपकरण खरिद र कर्मचारी तलब लगायतका क्षेत्रमा १ करोड ७५ लाख ७२ हजार रुपैयाँ खर्च भएको छ।

५० शैयाको यस अस्पतालले २४ सै घण्टा आपतकालीन सेवा, ल्याब, फार्मेसी, भिडियो एक्स–रे र फिजियोथेरापी सेवा उपलब्ध गराइरहेको छ। अस्पतालले पूर्वाधार विकास र बिरामी सेवामा गम्भीरता देखाएको प्रति सेवाग्राहीहरू सन्तुष्ट देखिएका छन्।