युकेको टनब्रिजमा रहेका नेपाली समुदायको समन्वयमा जुटाइएको राहात सामग्री काभ्रेपलाञ्चोकको पनौती नगरपालिका वडा नं. ११, बल्थलीको बाढी प्रभावित क्षेत्रमा वितरण गरिएको छ।
नेपाल राष्ट्रिय फुटबल टोलीका पूर्व म्यानेजर तथा सरस्वती युवा क्लबका वर्तमान अध्यक्ष उत्तम भण्डारी, बागमती प्रदेशका सांसद सुनिल केसीको पहलमा वितरण गरिएको हो।
राहात सामग्रीमा कम्बल, लुगा, स्टेशनरी, पुस्तकहरू र अन्य शैक्षिक सामग्री समावेश गरिएकाे थियाे। यो सहयोगले चिसो जाडो मौसममा बालबालिकालाई मद्दत पुर्याउनुका साथै बाढी र पहिरोबाट प्रभावित क्षेत्रका विद्यार्थीहरूको शिक्षालाई प्रोत्साहन गर्ने लक्ष्य राखेको छ।
राहात वितरणका क्रममा सांसद सुनिल केसीले त्यहाँको दयनीय अवस्थाप्रति आफ्नो गहिरो चिन्ता व्यक्त गरे। उनले भने, “यहाँको अवस्था हेर्दा मेरा आँखा आँसुले भरिए। हामीले बाल्यकालमा सबै सुविधा पाएँ, तर केहीले मात्र सुविधा पाउनु पर्याप्त होइन। राष्ट्रका प्रत्येक बालबालिकाले स्वास्थ्य, शिक्षा, भोजन, रोजगारी र करियर निर्माणका अवसर पाउनुपर्छ।”
विद्यार्थीहरूले सामना गरिरहेका समस्या झन् गम्भीर देखियो। विद्यालयका एक शिक्षकले चिसोका कारण कक्षाकोठा प्रयोग गर्न असम्भव भएकाले विद्यार्थीहरूलाई घाम ताप्न बाहिर खुला मैदानमा राख्नुपरेको बताए। धेरैजसो विद्यार्थी दुई घण्टाभन्दा बढी पैदल हिँडेर विद्यालय आउँछन् भने जुत्ता किन्ने आर्थिक क्षमता नभएका कतिपय विद्यार्थी चप्पलमा, र केही खुट्टा नांगै विद्यालय आउने गरेको शिक्षकले जानकारी गराए।
आवश्यकता पहिचान
स्थान छनोटको प्रक्रिया वर्णन गर्दै उत्तम भण्डारीले भने, “शुरूमा यस्तो अवस्था नजिकै पनौती नगरपालिकाको छेउमै हुन सक्छ भन्ने कुरामा विश्वास थिएन। तर, जब मलाई फोटोहरू देखाइयो, तब मात्र मैले यो स्थान सहयोगका लागि उपयुक्त ठानेँ। अन्ततः, यो स्थानको अवस्था हाम्रो अपेक्षाभन्दा पनि खराब रह्यो।”
राहत वितरणको प्राथमिक उद्देश्य असोजमा परेको भारी वर्षाका कारण आएको पहिरो र बाढीबाट प्रभावित क्षेत्रलाई सहयोग गर्नु थियो। तर, सरकारी र गैरसरकारी संस्थाहरूले धेरैजसो प्रभावित क्षेत्रलाई राहत पुर्याइसकेको अवस्थामा बल्थलीको विद्यालय छानिएको हो।
शिक्षा र जीवनस्तरमा सहयोग
राहत सामग्रीले तत्काल र दीर्घकालीन दुवै आवश्यकताहरूलाई ध्यानमा राखेको छ। जाडोबाट जोगिन कम्बल र लुगा प्रदान गरिनुका साथै विद्यार्थीहरूको शिक्षालाई सहज बनाउन स्टेशनरी र पुस्तकहरू पनि प्रदान गरियो।
यो पहलले दुर्गम र पिछडिएका क्षेत्रका बालबालिकाको आधारभूत आवश्यकता पूरा गर्न र शिक्षामा सहयोग पुर्याउन महत्त्वपूर्ण प्रभाव पार्ने विश्वास गरिएको छ। टनब्रिजस्थित नेपाली समुदायको पहल र समर्पित व्यक्तिहरूको नेतृत्वले यस्तो सहयोगले सकारात्मक परिवर्तन ल्याउन सक्ने देखाएको छ।
तपाईको प्रतिक्रिया !
सम्बन्धित समाचार
