जनता समाजवादी पार्टी नेपालले २१५ सदस्यीय केन्द्रीय कमिटी गठन गरेको छ । यही जेठ २८ देखि ३० सम्म जनकपुरमा सम्पन्न महाधिवेशन अध्यक्षमा उपेन्द्र यादवलाई चयन गर्दै सम्पन्न भएको थियो ।

महाधिवेशनले यादवलाई अध्यक्षमा चयन गरे पनि केन्द्रीय कमिटी भने घोषणा भएको थिएन । तर, महाधिवेशले केन्द्रीय कमिटी घोषणा गर्ने अधिकार यादवलाई दिएको थियो । त्यसका साथै केन्द्रीय पदाधिकारी र केन्द्रीय कार्यकारिणी सदस्य घोषणा गर्ने अधिकार पनि यादवले नै लिएका थिए ।

सोहीअनुसार बिहीबार यादवले २१५ सदस्यीय केन्द्रीय कमिटी घोषणा गरेका हुन् । उनले ९ जनाको केन्द्रीय कार्यकारिणी समिति बनाएका छन् ।

केन्द्रीय कार्यकारिणीमा अध्यक्ष यादवका साथै रकम चेमजोङ, गोविन्द चौधरी, प्रकाश अधिकारी, मृगेन्द्र कुमार सिंह यादव, मनीष कुमार सुमन, राजकिशोर यादव, लालबाबु राउत र शिवलाल थापामगर रहेका छन् ।