उपसभामुख इन्दिरा रानाले संसद बैठकमा सांसदहरू घ्वारघ्वार घुर्दै निदाउने गरेको भन्दै आपत्ति जनाएकी छन्। उनले संसद बैठकका वेला सांसदहरू घुर्दै निदाउने गरेको आफूले देखेको बताइन्।

आइतवार संसद भवनमा ६६औँ संसद दिवसको अवसरमा आयोजित कार्यक्रमलाई सम्बोधन गर्दै उनले सांसदहरू घुर्दै निदाउने गरेकोमा आपत्ति व्यक्त गरेकी हुन्।

उनले संसदमा फोटो खिच्न आफूले नपाउने भए पनि संसद दिवसको अवसरमा आयोजित कार्यक्रममा पनि सांसदहरू निदाएको भन्दै फोटो र भिडियो खिचेर राखेको दावी गरिन्।

उनले सुत्ने वेला नभएको भन्दै सभामा सुतेर सपना नदेख्न सांसदहरुलाई सचेतसमेत गराइन्। उनले सांसदहरूले नीति निर्माणमा बढी जोड दिएर काम गर्न आवश्यक रहेको सुझाव दिइन्।

‘संसदमा फोटो खिच्न मिल्दैन, घ्वारघ्वार सुतिरहेको हुनुहुन्छ मान्यज्य”हरू। यहाँ मलाई के भन्न मन लाग्यो भने यहाँ पनि धेरै सुतेको देखेँ। अलिअलि रेकर्ड पनि गरेर राखेकी छु मैले‚’ उनले भनिन्‚ ‘यो सुत्ने तरिकाले चाहीँ हामी सभामा नबसौँ‚ जाग जाग नेपाली भन्न मन लाग्यो मलाई। सुत्ने वेला भएको छैन, सुतेर सपना नदेख्नुस्।’

उपसभामुख रानाले महिला मन्त्रालयको बजेट एउटा परियोजना बराबर पनि नभएको भन्दै दुःख व्यक्त गरिन्।